قال شاعرنا عقوب الشرمي:أول كلامي يبتدا تفصيله .. انصلي علي طه رسول الله
محمد نبينا ماهناك مثيله .. شاهر الدين وهو اللي حاياه
ونحمد الله بنعمته الجليلة .. حمدا اعداد الكون من مبداه
كريم ربنا ياناس في تعديله .. رزاق الحوته في غزير مياه
او حاصي النمله في ارمال ثقيله .. او سامع الداعي عند وقت دعاه
وبعد الصلاة ع الرسول خليله .. نبدا ابقولي واسمعوا معناه
وانتحي اللي سامعين عيله بعيله .. وراجل براجل كل حد بسماه
ونا كل حد نطريه بمفاعيله .. واللي دار في جميل ماننساه
ولد لصل ماينسى اللي جاريله .. واللي دار له واجب ايشيل ثناه
وراه العمر يفنى والسنين طويله .. وراه كل واحد يذكره ممشاه
قولت افلان لها ابنود ثقيلة .. ماهي امغير بلبسة العباه
لاخير في مقوي يفوت هزيله .. ولاخير في وجهن ايقل حياه
الواجب ع لنسان حمله ايشيله .. ويصبر ولو مال الزمان امعاه
ومااهناك واحد نين فيه فضيله .. وماعمر تم الصيد كيف الشاه
والصاحب اللي يجفاك لاتمشيله .. عدا الا ميت ودير عزاه
حتى من احذاك ان كان شال رحيله .. كيف مايكون بعيد كي لاماه
عطيب المراضي ياخذك في سيله .. ويكره كلامك وين ماتنهاه
سلامي علي لجواد وافي كيله .. اعداد ماخلق بين الوطا وسماه
فرد الشاعر غالب بو مطير وقال:
لسان اللبنادم في الكلام دليله .. او لحن العلل يضهر اللي يكماه
ميط م العرب شايل احمول ثقيلة .. واللي يحمل مايندم علي حملاه
وربك ايغير بين يوم وليلة .. ويجيب الفرج كي تيّس المنجاه
ودك القول ايكون في تعديله .. ويشوف ماسبق يمشي علي معناه
حلوات الطبيب ان كان جاه عليله .. ايجس المرض يعرف سبايب داه
والصاحب اللي من عازتك تشكيله .. انجاه العيب منه دوسه وانساه
ادم خطي من قبل ماله حيله .. اوين ماارتجع سامحه مولاه
وان كان ميّلت لازم لها تعديله .. عمر المراجي مايخيب رجاه
وراه الصبر حكمه مالقيت مثيله .. ولا بالعطيبه تنفع مكافاه
والصاحب اللي ناوي ع التسبيله .. امغير منقده جبدت سوال معاه
لو قدت له راس اصباع فتيله .. دوار الخطا يصعب عليك هداه
يامن هديت الكل ضي سبيله .. اوعام ابما في مامضى درناه
من فيض رحمتك تهدي انفوس عليله .. اوكل من اخطي ساب الطريق وتاه
فرعون قولي وين الجنود وخيله .. وقارون ماله ماعرف يفداه
ونمرود وقتن ضل بمفاعيله .. بضعف المخلوقات قل هناه
اوعاد كي بنا قصره نظم تعديله .. ابدال الحجر دار الذهب مبناه
اخذو موعضة م الدهر وايش جريله .. ربك طلق ريح الحسوم فناه
ولاتحسدوا هللي ربنا عاطيله .. ولاتهزو عللي ذاهبات رياه
ولاتفتنوا ولاتفعلوا الرذيله .. او لاجير في وقته عطوه اكراه
او لا ف الحرام تسهلوا تحليله . او لاتحرموا من ربنا حلاه
حافظ علي دينك بكل وسيله .. راه الزمان ايديرلك ملهاه
او جهز ودير احساب يوم الشيله .. خيوبه عللي مايدير وتاه
عمرك ايعدي وانت ماصاحيله .. كم صاحبن فارق ودرت عزاه
واجبه عليك احدودها تصميله .. مااتريد في قبره اتخش معاه
ناقلت قولي واسمعوا تسجيله .. واجب انقول الحق مانكماه
وانصي عللي ماهناك مثيله .. علي عد مابين الوطا وسماه
او نفسي نسافر للنبي نمشيله .. وانشاهد الروضة والبقيع احذاه
